កីឡាករ សួន ចាន់ដារ៉ូ បានឲ្យដឹងពីប្រទេសថៃថា សម្រាប់ការចូលរួមក្នុងទ្រនំថ្មីនៅទីនោះ មិនមានអ្វីជាការលំបាកនោះទេ មិនថាការហូបចុក ការស្នាក់នៅគឺធម្មតាដូចនៅភ្នំពេញដែរ ហើយពេលនេះកំពុងហ្វឹកហាត់ជាមួយកីឡាករដទៃក្នុងក្រុមជាបណ្ដើរៗហើយ។
អតីតអ្នកប៉ះសេរបស់វិសាខារូបនេះបន្ថែមថា ចំពោះការប្រើប្រាស់ភាសាថៃរៀងពិបាកបន្តិច ដោយសារខ្លួនទើបតែចេះបន្តិចបន្តួច ប៉ុន្តែអាចស្ដាប់បាននៅពេលគេនិយាយ មិនថាពេលធម្មតា ឬពេលហ្វឹកហាត់នោះទេ។
ចំពោះការហ្វឹកហាត់វិញនៅលេងមិនទាន់ត្រូវគ្នាឡើយ ព្រោះរបៀបលេង និងកលល្បិចរបស់ក្រុមនិមួយៗខុសគ្នា ដូច្នេះត្រូវការពេលវេលាហ្វឹកហាត់ជាមួយគ្នាបន្ថែមទៀត។ រឿងថាអាចជួយក្រុមឈ្នះពានរង្វាន់លីគកំពូលបាល់ទះថៃរដូវការនេះ កីឡាករកម្ពុជាម្នាក់នេះ មិនទាន់ហ៊ានធានាទេ ព្រោះទើបនឹងបានហ្វឹកហាត់ជាមួយគ្នា មិនទាន់ដឹងសមត្ថភាពកីឡាករក្នុងក្លឹបនេះខ្លាំង ឬខ្សោយ ហើយណាមួយក្លឹបនៅឯប្រទេសថៃខ្លាំងៗច្រើន។សួន ចាន់ដារ៉ូ ជាអតីតកីឡាករក្លឹបបាល់ទះវិសាខា ហើយគេចេញពីកម្ពុជាតាំងពីថ្ងៃទី៤ ខែវិច្ឆិកាមកម្ល៉េះដើម្បីទៅលេងឲ្យក្លឹបបាល់ទះរបស់ថៃ Khon Kaen VC មួយរដូវកាលដើម្បីប្រជែងពានរង្វាន់ឆ្នាំ២០១៧-២០១៨នេះ។ គិតមកដល់ពេលនេះមានកីឡាករកម្ពុជា៣រូបហើយបានលេងនៅលីគកំពូលបាល់ទះថៃ គឺកីឡាករ មី រស្មី(NK Fitness) នៅ សាម៉េត និង សួន ចាន់ដារ៉ូ (Khon Kaen VC)៕
Post a Comment