លោក ប៊ុត ចាន់ណា
ទឹកប្រាក់ដែលរដ្ឋាភិបាលផ្ដល់ជូនដល់សិល្បករផ្នែករបាំ នៅពេលចេញទៅសម្ដែងនៅក្រៅប្រទេសគឺ ២០ ដុល្លារអាមេរិក ក្នុងមួយថ្ងៃ។ ចំណែក ប្រធាននាយកដ្ឋានទទួលបាន ៣០ដុល្លារ អនុប្រធាននាយកដ្ឋានទទួលបាន ២៥ដុល្លារ និងប្រធានការិយាល័យ ទទួលបាន ២៥ដុល្លារ ក្នុងមួយថ្ងៃ។
លោកបានបន្ថែមថា រាល់ការចេញទៅសម្ដែងនៅក្រៅប្រទេស ភាគច្រើនសិល្បករមិនទទួលបានប្រាក់ឧបត្ថម្ភពីប្រទេសដែលបានអញ្ជើញនោះឡើយ ដោយប្រទេសខ្លះគ្រាន់តែជូនជាសំបុត្រយន្តហោះកន្លែងស្នាក់នៅ និងអាហារប៉ុណ្ណោះ។ លោកបន្តថា មួយរយៈចុងក្រោយនេះ ភាគច្រើនពេលសិល្បករចេញសម្ដែងក្រៅប្រទេស រដ្ឋាភិបាលជាអ្នកចេញថ្លៃសំបុត្រយន្តហោះ។ «យើងជូនប្រាក់គាត់នេះ គិតទៅតាមថ្ងៃដែលធ្វើការទេ ព្រោះគាត់ជាបុគ្គលិករដ្ឋ ដូច្នេះរដ្ឋជាអ្នកចំណាយ ទោះទៅប្រទេសជិត ឬឆ្ងាយក៏ទទួលបានប៉ុណ្ណឹងដែរ បើគាត់ចេញទៅ១០ថ្ងៃ យើងយកប្រាក់ដែលគាត់បានក្នុង១ថ្ងៃគុណនឹង១០ទៅឃើញហើយ»។ នេះជាសម្ដីរបស់លោក ប៊ុត ចាន់ណា។ បើតាមការបញ្ជាក់ពីប្រធាននាយកដ្ឋានសិល្បៈទស្សនីយភាពដដែល គិតពីការនាំយករបាំបុរាណ និងរបាំប្រពៃណីចេញទៅសម្ដែងនៅក្រៅប្រទេសតាំងពីដើមរហូតដល់បច្ចុប្បន្ន បានសម្ដែងស្ទើរតែគ្រប់ទ្វីបលើសកលលោក ហើយបើគិតជាប្រទេស បានរាប់រយប្រទេសហើយ៕
Post a Comment